寻日又到周末，我地两兄地食过翻寻味，一早又开车翻林场稳餐靓鱼食。
哩云唔敢开细佬架钱七面包车，上次半路死左两次火，吓到我鼻哥窿都无肉，开左个妹架“赛欧”仔，细就系细D，不过包无死火，稳阵好多。
翻到林场，各就各位，又系上个周六既位置，哩次实食无糍牙，用翻上次D饵，仲会走鸡咩？
点知世事既野就系甘“桥”，两兄弟从朝早九点几开竿到下昼三点，鱼毛都无条，果支漂旭都未旭过，平时我把衰口叫距“定海神针”，点知今日“好既唔灵丑既灵”，应晒个把“衰”口，无计！细佬就好似个日本首相--左腾右腾，搓左几次鱼饵都系得个“吉”。
百无聊籁，同细佬讲翻起几十年前既往事......
话说上世纪六十年代，中国正进行文化大革命，当时我16岁，细佬14岁，学校停晒课，无书读，系屋企混混噩噩，虚度光阴。
当时我屋企住系珠江边，天热果阵每日两兄弟都着条牛头裤去珠江游水，当时果D水质不知几靓，依家就衰到唔恨！
老豆见我地甘中意系江边玩，不如买张网比我地“咬鱼”啦！
搞好果个“咬”鱼既架步，（唔知点解，当时无人干涉，如果依家，果D城管唔黎拉人夹封艇才怪！）两兄弟夹手夹脚，一网又一网，哈！真系稳到啖食。
记得当时系5.6月，果D海入便既黄鱼逆流到珠江上游产卵孵仔，黄鱼仔就巡着退潮游翻大海，点知有好多唔好彩途经我地既网，日日比我地网几十斤，两兄弟欢喜到傻左！
黄鱼仔实在太多，旁边围观果D师奶问卖不卖？卖！点解唔卖？五毫子一斤，其实我地无称，求其拿D比距地.日日稳十元八块，以当时既生活条件，不知几和味，好似依家中左大奖甘开心。
好景不长，十零日之后，D黄鱼仔唔见晒，不过却留比我地多么美好即回忆！
两兄弟讲下讲下，不知不觉已经下昼五点，只系钓左一条鼻屎甘细既白鲫仔，蒸出来一著就无左，唔食得，放翻落去，第日钓过。
执好架生，细佬行去屋后屙尿，睇见阿发种果D番茄红当当，鬼甘惹火.问我摘唔摘得？梗系得啦！钓唔到鱼，仲唔拉猪补只狗咩！稳袋番茄翻去好过勿野都无甘阴功！